科技發展急速，人工智能及元宇宙等概念正顛覆我哋嘅認知。或許不久將來，意識將擺脫驅體束縛，超然於生死時間。是次展覽設想咗一個後奇點（物理定律無法適用之地）入面嘅烏托邦/反烏托邦，透過藝術家嘅視覺窺探未來世界。除咗喺中環Woaw Gallery展出實體作品，策展方亦聯同Epoch Gallery邀請藝術家喺REPLICANTS虛擬展覽中重塑中環皇后大道，以作品大膽預測其對未知嘅想像。
踏入展廳，Nik Kosmas嘅作品《Collapse 4》將一個女性雕塑機器人置於展場中央，機器人從畫廊地面升起，動作仿似定格喺進入或被排斥於展場上方以玻璃樽堆砌嘅蟲洞之際。環顧四周，Theodore Boyer將畫廊牆壁變成一張星圖，藉作品開闢通往新現實多元宇宙嘅路徑。Hortensia Mi Kafchin《For the universe massaging itself》將漆黑虛無嘅空間描繪成按摩師，撫慰女性身心，直至她與周遭冰冷嘅擁抱融為一體。Greg Ito嘅圓形畫作《Let Me Grow》則展現人類文明步向末世前嘅景象，揭示通往未知虛擬世界嘅窗口。
越過星圖，推門進入另一個實體展覽空間。牆上陳列Dr Woo《Nothing the God of biomechanics wouldn't let you into heaven for 1–7》，7個以數碼技術繪製嘅面具，各自呼應不同功能及寓言，單獨作NFT拍賣。買家投得作品後可選擇以NFT作品兌換為Dr. Woo設計嘅實體紋身；或將NFT作品永存於區塊鏈當中。
Dr. Woo等藝術家嘅NFT作品同時跨越「恐怖谷」，進入展廳一角嘅REPLICANTS虛擬展覽。虛擬展覽基於1982年電影Blade Runner嘅反烏托邦世界，突破實體空間限制，渲染出一個未來皇后大道，末世後人類不復存在，唯有機器同藝術充斥其間，Konrad Black嘅配樂為展覽更添神秘氣息。
虛擬世界中嘅Woaw Gallery展覽空間懸掛住刻上Dr. Woo面具紋身嘅屍體/身體替代部位，或許係對那些燃燒NFT代幣讓身體著墨嘅人嘅預言。展廳另一邊有《Galath3a Salon》，作品探問人類與機器共存嘅關係。四周散落不同區域呈現機械臂為女士美容嘅場景，中央嘅螢幕播放Galath3a團隊嘅人機互動研究短片，機械臂模仿人類動作，慢慢靠近女性研究員，喺女士臉上作畫。作品將性別角式及權力結構對倒呈現，試圖透過人機互動建立互信。
抬頭望向街角廢棄摩天大樓，外牆大型廣告牌被Jennifer West《Skyscraper Painted Hacker Cats》佔據。作品啟發自社交媒體上大量貓咪影片，藝術家以高對比度顏料為菲林著色，掃描後製成數碼GIF圖，作品騎劫象徵資本主義嘅大型廣告牌，以隱晦地旋轉嘅貓照亮虛擬城市嘅夜空。
小編所見整個虛擬展覽喺空間運用上絕不馬虎，視覺元素上借鏡Blade Runner嘅虛擬空間紛雜大量霓虹燈，展品呈現方式大膽，相比實體展覽可謂略勝一疇，配合數碼渲染技術，觀展體驗更完整。REPLICANTS虛擬展覽本身亦作為一件NFT作品獨立出售，可見NFT藝術市場嘅無限潛力。虛實並行嘅展覽方式，讓Woaw Gallery成為實體世界、精神世界以及虛擬世界嘅串連入口。
TEKNOLUST: OBJECTOPHILIC FUTURES
日期：即日至 2021 年 11 月 24 日
時間：11:00 – 19:00（星期二至六）
地點：Woaw Gallery（中環皇后大道中9號）
Comments